وجے واڑہ ،20؍اپریل (ایس او نیوز؍ آئی این ایس انڈیا )آندھرا پردیش کے وزیر اعلی این چندرا بابو نائیڈو مرکزی حکومت کے ذریعہ ریاست کو خاص درجہ (ایس سی ایس ) نہیں دئے جانے کے خلاف آج یہاں آئی جی ایم اسٹیڈیم میں دھرم پورتا گیلری میں ایک روز ہ بھوک ہڑتال پر بیٹھے ۔ بابو نائیڈونے بھوک ہڑتال پر بیٹھنے سے قبل مہاتما گاندھی ، تیلگو دیشم پارٹی کے بانی این ٹی راما راؤ ، ڈاکٹر بی آر امبیڈ کر اور مجاہد آزادی پوٹی شری رامولو کی تصاویر پر پھولوں کے ہار چڑھائے ۔کنک درگا مندر کے پجاری اور مذہبی پیشوا نے بھوک ہڑتال شروع کرنے سے پہلے انھیں دعائیں دیں ۔ ان کا آج یوم پیدائش بھی ہے ۔ وزیر اعلی نے کالا بلا لگا کر مرکزی حکومت کے خلاف احتجاج کیا ۔ مسٹر نائیڈو کے علاوہ ان کے لڑکے نارا لوکیش ، وزیر نینی دیوی ، اما مہیشور راؤ، کولورویندر ، این آنند بابو سمیت کئی ممبران پارلیمنٹ اور ممبر اسمبلی بھی بھوک ہڑ تال پربیٹھے۔دھرم پورتا گیلری سبھی پارٹی کارکنان ، طلبہ اور خواتین سے بھراہوا تھا۔ریاست کے سبھی 175اسمبلی حلقوں میں وزرا اور کارکنان بھی بھوک ہڑتال پر بیٹھے ہیں ۔